Urduliz dorrea azken belaunaldiko etxe orratz bihurtu da

Uribe Kostako eraikin enblematikoa da, eta, duela gutxi zaharberritu ondoren, enpresa- eta bulego-erabilera izango du. Geotermia eta energia fotovoltaikoa ezarri direlako, Euskadiko eraikinik buruaskienetako bat da.

Maratekek, Aecomen eskutik, dorreko 7., 8., 9., 10. eta 11. solairuetako instalazio mekaniko eta elektrikoak garatzen parte hartu zuen, bai eta instalazio horiek erabiltzeko jarduera-memoria idazten ere. 2016ko uztailean hasitako birgaitze-prozesu baten ondoren, dorrearen ateak ofizialki irekitzeko xehetasunak lantzen ari da.

Multzoak 7.907,15 metro karratuko eremua hartzen du, eta hamalau solairuren gainean altxatzen da. Solairu horiek eraldatzeko eta modernizatzeko, sei milioi euro inguruko inbertsioa egin da. Energia-, jasangarritasun- eta ingurumen-eraginkortasun handiko teknologia berritzaileak eta aplikazioak txertatzen ditu. “Sartu dugun geotermia eta energia fotovoltaikoa direla eta, Euskadiko eraikinik buruaskienetako bat da”, azpimarratu du Asier San Nicolas Urdulizko Industrialdeko gerenteak.

BULEGOAK

Hamalau solairuetatik, dozena bat bulegoetarako dira, eta guztira 4.848 metro koadroko azalera hartzen dute. Bulego bakoitza enpresen behar espezifikoen neurrira egokitzen da, eta 45 eta 540 metro koadro bitarteko espazio modularrak eskaintzen ditu.

Bestalde, beheko solairuan 167 metro koadroko sarrera duen atari ikusgarri bat dago, Urdulizko Industrialdeko gune partekatuak eta bulegoak biltzen dituena, bai eta 50 metro koadroko alokatzeko bilera-gela bat ere. Gainera, eraikinak bi igogailu, eskailera nagusi bat eta larrialdietarako beste bat ditu, solairu bakoitzera sartzeko. Txartel magnetikoaren bidez sartzen da horietako bakoitzera.